Lê so plat soos ’n plank!

Die HAT omskryf die woord "plank" as 'n "plat reghoekige stuk gesaagde hout". Dis kwalik iets om oor opgewonde te raak, maar 'n nuwe gier wat wêreldwyd opslae maak, het aan die plank 'n tweede asem gegee.
Rudolf Stehle vind meer oor dié nuutjie uit.

Planking, oftewel "die praktyk om op jou maag te lê met jou arms langs jou sye in ongewone openbare ruimtes en dit dan af te neem," het sosiale netwerke soos Facebook aan die gons.
Die idee is om 'n plank na te boots.

Die reëls van dié tydverdryf is eenvoudig: Jou handpalms moet plat teen jou sye gedruk wees, jou gesig moet na onder wys en jou
enkels moet bymekaar wees.
'n Foto moet ook van die plank geneem word. Anders is jy maar net iemand wat iewers lê en snaaks lyk.
Dié gier het in 1997 ontstaan toe twee verveelde Britse tieners, die 15-jarige Gary Clarkson en die 12-jarige Christian Langdon,
begin het om, tot groot verbasing van omstanders, in openbare ruimtes te plank.

Destyds het dié tydverdryf nog as die lying down game bekend gestaan.
Oor die volgende tien jaar het die gier maar teen 'n slakkepas versprei, totdat Facebook sy opwagting in Engeland gemaak het.
Nadat die twee in 2007 'n Facebook-groep vir hul speletjie geskep het, het dit soos 'n veldbrand versprei.
Foto's het ingestroom van plankers uit Amerika, Brittanje en die res van Europa.
Dié gier het in 2009 in die internasionale media opslae gemaak toe sewe dokters en verpleegsters by 'n hospitaal in Engeland uitgevang is toe hulle die lying down game in werksure gespeel het.
Hulle het foto's van waar hulle op operasietafels, in die hospitaal se gange en op die hospitaal se helikopterbladplank, op Facebook geplaas.
'n Bestuurder het die foto's gesien en die oortreders is geskors.

Die speletjie het in 2008 in Australië posgevat, waar dit as planking bekend staan. Planking se gewildheid in dié land het sedertdien die hoogte ingeskiet.

Die Facebook-blad Planking Australia is die grootste in sy soort met meer as 170 000 aanhangers, terwyl Clarkson en Langdon se Facebook-groep, The lying down game, net meer as 110 000 lede het.

In Suid-Afrika het die gier eers in Mei vanjaar vastrapplek gekry toe 'n Facebook-blad, Planking South Africa, gestig is.
Dié blad se aanhangertal is egter gou-gou oortref deur dié van The Original Planking South Africa, wat tans byna 1 300 aanhangers het.

Sedertdien het die Wes-Kaap en Pretoria ook Facebook-groepe gekry wat oor dié tydverdryf handel.
Garth Manthé (24) stigter van die Facebook-blad The Original Planking South Africa het via 'n video op YouTube met planking kennis gemaak.
Hy plank nog net twee maande.
"Dit is iets wat maklik kom vir my. Ek het 'n goeie humorsin en geniet dit om 'n vervelige situasie meer opwindend te maak. Dit is 'n manier om mense bymekaar te bring. Wanneer ons plank, is baie mense onseker oor wat ons doen, so dan is daar baie gesprekke en word daar baie gelag."

Die mees ekstreme plank wat hy al uitgevoer het, was op 'n verkeerskonstabel se kar.
Om sy blad se mylpaal van 1 000 aanhangers te vier, het hy 'n Planking SA T-hemp aan 'n gelukkige wenner oorhandig.

Julia Vermeulen, 'n gr. 9-leerder aan die Hoërskool Durbanville, het haar netbalspanmaats van die o.16-span onlangs oorreed om voor 'n oefening op die skool se netbalbaan te plank.
"Ons het gedink dit sal 'n goeie spanboupoging wees," het Julia gesê.
Met haar aankoms by die oefening was die afrigter, me. Eloïse Keet, nogals uit die veld geslaan.
"Toe ek daar kom, toe lê die spul soos apies op die baan en hou hulle snaaks. Toe neem ek maar 'n foto met my selfoon."
Keet het kort tevore in Die Burger van planking gelees en het gelukkig gou gesnap wat aangaan.

Tydverdryf kan ook dodelik wees
Planking het sy eerste slagoffer op 15 Mei vanjaar geëis toe die 20-jarige Acton Beale van 'n balkonreling op die sewende verdieping van 'n woonstelgebou in Brisbane geval het terwyl 'n vriend hom afgeneem het.
Twee dae later, op 17 Mei, het nog 'n 20-jarige Australiër, Simon Hallam, ernstige kopbeserings opgedoen deurdat hy van die kattebak van 'n bewegende motor geval het terwyl hy ge-plank het.
Op 22 Junie is 'n 14-jarige Britse seun in York in hegtenis geneem nadat hy op 'n treinspoor ge-plank het. 'n Foto van hierdie voorval het op die York Planking Association se Facebook-blad verskyn.