Net meer as ‘n jaar gelede was dit tyd vir ‘n roadtrip. Een epic langnaweek wat al vir ’n paar maande beplan is. Die Woensdag het Glen en Bruce by my huis aangekom. Môre ry ons Kaap toe.
Dag 1
Ons het net voor 6 in die pad geval. Vanaf Cradock ry ons na Graaff-Reinet, en dan verder suid met die N9. Die ooppad na Aberdeen is stil. Bruce dut so ‘n bietjie. Ek en Glen filosofeer oor lewe in die deel van die land.
Die dam het vir die eerste keer in jare water in.
Beervleidam
Na omtrent ‘n halfuur se rondkyk en bene rek ry ons verder suid. Die R341 vat ons tot op De Rust waar ons stop vir brunch.
Magies vol en nou moet ons verder. Maar ons is nou hier so ons ry eers noord. Ek het jare terug laas deur Meiringspoort gery, en toe was daar nie gestop nie. Ons het nou die tyd.
MeiringspoortDaar word by amper al die driffies gestop, en tussen my en Glen word foto’s geneem, party sommer so in die ry.
Na die uur se detour is ons weer oppad. Volgende stop, Oudtshoorn. Ek het baie jare terug vir so twee en ‘n half jaar hier gebly. Die dorp het egter so baie verander.
Die tenk word volgemaak en die volgende been aangepak. Die R62 wes. Met tussen poses is dit baie stil in die kar, albei passasiers dut.
By Barrydale wou ek stop, maar die plek is toe en ons ry verder.
Volgende stop en bene rek is in Robertson.
Die pad raak besiger tot in Worcester, waar die detour na die N1 ‘n paar mense omvergooi.
Net voor die tonnel haak ek ‘n links en ry oor die pas.
Net voor half sewe kom ons in Paarl aan en ontmoet eers ons gasheer vir iets te drink.
En toe is dit na sy huis vir ‘n lekker aand se kuier.
